主頁 » 戲劇劇場 » 「長者劇場」的「本土戲劇」

「長者劇場」的「本土戲劇」

IMG_3974

各位,

多謝大家今晚到欣賞「身心靈劇社」呢次嘅演出。頭先聽到大家嘅掌聲,感到好開心,呢啲掌聲對我哋呢個「長者劇場」嘅長者演員講,無疑係一種鼓舞同激勵。

 所謂「長者劇場」,senior theatre,早喺30年前喺外國陸續出現。因為隨住長者數量增加,佢哋嘅身體本來係好健康,但當佢哋一退休之後,身心健康就會下降。所以,好多學者不斷去研究,搵出點樣解決呢啲問題。其後發現長者劇場係其中一個好有效減低心理健康下降、同時能夠保持精神狀態活躍嘅活動。

 我哋試想像一下,喺呢個本來完全空洞嘅舞台,若果交由一群年青嘅藝術工作者去創作,當然會創作出一齣好靚而又多采多姿嘅舞台劇或音樂劇。但係,交畀一班退休人士,而呢班退休人士喺佢地退休之前,係從來冇接觸過戲劇、電影或者其他表演嘅藝術工作,點可能創作出一齣合格嘅舞台劇或音樂劇呢?頂多嘛一齣「也也烏」嘅戲。不過,喺3年前,呢種難以想像嘅事已經變得好實在。

 3年前,即係2015年,「鄰舍輔導會」引入咗呢類長者劇場。其實之前亦都有長者劇場,但只係著重「口述歷史」記憶劇場形式,畀長者喺舞台上回憶佢地當年所見,至於好似今晚我哋呢個戲劇《那些年傳奇》,咁富戲劇性嘅表演,喺香港確實好少見。

 2015年4月,「鄰舍輔導會」成立「身心靈劇社」之後,我哋呢班長者開始創作同排練,到咗8月,喺愉景灣智新書院作第一次演出,當時反應好好,所以我哋繼續朝呢個方向去,兩個月之後,喺浸大嘅大專會堂再上演。由於場地難求,隔咗一年,我哋先至喺柴灣「青年綜藝館」再度上演。反應更加好,因為有好幾位學校師長都有嚟睇。佢哋睇完之後,覺得好好,好有本土精神,將香港過往艱苦奮鬥嘅歷程,用好樂觀嘅態度,喺舞台上以戲劇嚟演出。將原來「四日嚟一次水」嘅制水艱苦生活,喺舞台上都變得好開心,因為有咗樂觀嘅精神,對生活就起咗一個積極作用。而佢哋喺歡樂嘅同時,仍然埋頭刻苦去創業,將Made in Hong Kong嘅產品推銷到全世界。當喺劇裡面出現去天台學校時,有啲年紀大嘅老師好有感觸,因為佢哋正正就係喺天台學校小學畢業。

 那一年,香港確實好傳奇,所以我哋呢個長者劇場嘅創作,都係以過去幾十年嘅香港生活嚟做藍本,例如剛才大家欣賞嗰齣《屠夫。義工》係好本土嘅故事。類似呢啲題材,幾十年嚟嘅生活,已經有好多隱藏喺我哋身邊,而呢啲創作元素,可以話係取之不竭,用之不完。亦因為呢個原因,好多學校就邀請我哋呢班長者演員去學校演出,幫助莘莘學子了解多啲我哋香港過去半個世紀所創造嘅奇蹟。

 由舊年11月開始,每個月都去唔同區嘅學校演出,而最近一次演出係喺今年7月嘅暑假之前,喺屯門裘錦秋學校演出。嚟緊嘅12月開始到出年5月,我哋呢班長者演員又要忙碌,繼續努力,將本土戲劇帶到各區學校,為我哋未來嘅社會棟樑獻藝。希望社會人士鼎力支持「身心靈劇社」嘅長者劇場!

 多謝大家!

(2017年10月12日晚,香港文化中心劇場)

001

 

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

w

連結到 %s