國泰收購快運 葉問丁力離場

【舉世皆醒無人醉】

擷取

這邊廂:

在國泰宣佈以49.3億元收購快運(HK Express)100% 股權的前一天,快運最大股東鍾國頌事先張揚,埋怨國泰過早洩露風聲,搞到「中聯辦『唔拉茄』,因為中聯辦唔想睇到「隸屬英資機構太古集團嘅國泰,成為『航空界嘅秦朝』」。眼見中聯辦發爛渣,鍾國頌唯有改口話「由始至終無意出售快運予國泰」。

那邊廂:

葉問和太太氣沖沖的從“amfAR 2019”香港慈善籌款晚宴走出,撞啱正要步入會場嘅丁力。丁力見兄嫂二人面燶燶,關心問發生咩事。兩夫婦分別咆哮話:哼,簡直豈有此理,歧視我哋中國人!我喺荷李活拍戲,畀佢哋歧視我都忍得,嚟到我哋中國人嘅地方,仲要畀佢哋歧視,是可忍屬不可忍!

丁力聽咗之後,諗都唔諗,即刻㷫過火屎:咁寸?哼,大哥,我都唔入去嘞,我哋走!

係吖嘛,佢哋究竟知唔知我哋中國人已經站起來嘞?

佢哋知條鐵!走,我哋去飲嘢。第二年請我呀,我都唔會嚟。

這邊廂:

國泰今次用咗唔到50億嚟收購快運,計起嚟都係6億幾美金,對祖國嚟講,十億八億美係濕濕碎,若果鍾國頌早啲講畀中聯辦知,王志文主任就會向大佬挪錢,冇話6億,60億隨時到位!

但,點解HK Express冚 得咁實,一啲風聲都冇流出嚟,連大老板鍾國頌都闇住把口唔講,令中聯辦「蒙在鼓裡」,最後令國泰變成「航空界嘅秦朝』」。

那邊廂:

關美人畀班狗仔隊包圍起嚟問,點解葉問師父一早就撇,連丁力嚟到門口都唔肯入會場,同葉問師父兩公婆一齊走去劈酒。

吓?有咁嘅事?係噃,我都唔覺眼佢哋喺度?你哋知道咩事嘛?

葉問師父話佢畀人歧視喎。

畀咩人歧視呀?

係畀外國人歧視。

係咩?點會呢?我完全唔覺得有呢樣嘢噃……(電話響) 咦,係葉問師父,對唔住,喂,葉師父,咩事咁㷫呀?哦……係咩?哦,佢哋係咩人呀?哦,哦,總之……哦,好,好,好。

葉師父點講呀?

……葉師父話,入便啲人歧視佢哋囉,就好似齣電影《綠簿旅友》嘅情節咁歧視我哋中國人囉。

佢有冇話啲咩人呀?

……總之歧視啦。

咁,總之係男定係女呀?

……佢話歧視就係歧視,我信葉師父講……係咁,我要趕住走,唔好意思,拜拜。